“Türkan qəsəbəsi yaxınlığında 7.99 hektar tikinti altı sahə olmaqla ümumilikdə 12.4 hektar ərazini əhatə edən Zeytun Emalı Kompleksi-nin istismara verilməsi 2021-ci ildə nəzərdə tutulmuş və əhalinin yüksək keyfiyyətli və sağlamlıq rəmzi olan zeytun məhsulları ilə təmin olunmasını məqsəd olaraq qoymuşdur.  Zeytun Emalı Zavodu layihəsi çərçivəsində emal prosesi zəncirinin tam qapalı edilməsi prinsipi əsas götürülməklə tullantıların emalını həyata keçirmək, yan sahələrin, xüsusilə zeytun tərkibli kosmetik vasitələrin, orqanik gübrələrin istehsalına əsaslı dəstək veriləcəkdir”.

Bu barədə Marja-ya “Grand-Agro” MMC şirkətindən bildirilib.

Qeyd edilib ki, Zeytun Emalı Kompleksi ərazisində, həmçinin şirkətin istifadəsində olan aqrotexnikalar üçün 1068 m2-lik sahədə texniki bina, təmir boksları, talvar, yanacaq doldurma stansiyası, yuma məntəqəsi, hər biri 1034m2 olmaqla ümumilikdə 2068m2 əhatə edən gübrə və təsərrüfat anbarlarının inşası nəzərdə tutulub.

Zavod layihəsi ölkəmizdə qeyri-neft sektorunun inkişafına töhfəsini verməklə Azərbaycanda, eləcə də regionda ən böyük zeytun emalı layihəsi olaraq məhsullarının həm ölkə daxili, həm də ixracı planlaşdırılır.

Məlumat üçün bildirək ki, "Grand-Agro" MMC Qala,Türkan, Hövsan, Zirə, Ramanada 1100 hektara yaxın ərazidə yeni zeytun və badam bağları salmış, 660 hektar köhnə bağlar bərpa edilmiş, 2021-ci sonunadək bağların sahəsinin 2500 hektara çatdırılmasını hədəfləyir. Artıq 350 nəfər daimi işlə təmin olunub, Zeytun Emalı Zavodu istismara verildikdən sonra isə ümumi işçi heyətinin 500-ə çatdırılması planlaşdırılır.

Zeytun Emalı Kompleksinin Video çarxı ilə aşağıdakı linkdən tanış ola bilərsiniz.